RSS

ජිනීවා ගැන ඇත්ත කියන්න මේ තරම් භය ඇයි?

19 Mar
ජිනීවා ගැන ඇත්ත කියන්න මේ තරම් භය ඇයි?

ජිනීවා යෝජනාවට එරෙහිව වීදි බැස්සවුන්ගේ සැබෑ වුවමනාව කුමක්දැයි මෙයින් මනාව පෙනීයයි. මාතෘභූමිය යනු මහින්ද රාජපක්ෂ නොවන බව මොවුන්ට කවදා පසක් වේවිද?

ශ‍්‍රී ලංකාවේ ජනාධිපතිවරයා විසින් පත්කැරුණාවූද සියයට සියයක්ම ශ‍්‍රී ලංකා රජය නියෝජනය කරන රාජ්‍ය තන්ත‍්‍රයක් ලෙස සැළැකිය යුත්තාවූද උගත් පාඩම් හා ප‍්‍රතිසන්ධාන කොමිෂන් සභාව විසින් ශ‍්‍රී ලංකාවේ ජනවාර්ගික අර්බුදය සම්බන්දයෙන් ඉදිරිපත් කරන ලද වාර්තාවේ අඩංගු නිර්දේශයන් ක‍්‍රියාත්මක කිරීම සම්බන්දයෙන් නිශ්චිත කාල රාමුවක් එක්සත් ජාතීන්ගේ මානව හිමිකම් කවුන්සිලයට ඉදිරිපත් කරන ලෙස ශ‍්‍රී ලංකාණ්ඩුවෙන් ඉල්ලා සිටීමේ යෝජනාවක් ඇමෙරිකා එක්සත් ජනපදය විසින් ජිනීවා මානව හිමිකම් කවුන්සිලයේ 19 වැනි සැසිවාරයට ඉදිරිපත් කරන බව එක්සත් ජනපද රාජ්‍ය නියෝජිතයන් පැහැදිළි ලෙස දක්වා තිබුණේ 19 වැනි සැසිවාරය ආරම්භ වීමටත් පෙර සිටමය. මේ සම්බන්දයෙන් හීන් “ඤාව්” ගෑමකින් පටන්ගත් ශ‍්‍රී ලංකා රජයේ විරෝධය පසුකාලීනව වියරු බිරුසන්දීමකට පරිවර්තනය වූවා සේම මෙම යෝජනාව සම්බන්දයෙන් රජය ඉදිරිපත් කරනු ලබන නිර්වචනයද කාලයත් සමඟ මහත් විපර්යාසයකට භාජනය වූ බව මෙම සිදුවීම් දෙස පරික්ෂාකාරීව බලන්නෙකුට පෙනීයනු ඇත.

අමෙරිකා එක්සත් ජනපදය ඉදිරිපත් කරන්නේ ‘ශ‍්‍රී ලංකාවට එරෙහි යෝජනාවක්’ යන මතය සමාජගත කිරීම සඳහා රජයේ සහ පෞද්ගලික මාධ්‍ය ආයතන සැදී පැහැදී සිටීම මෙම යෝජනාව සම්බන්ද අදහස මුලින්ම ඉදිරිපත් වූ සමයෙහි සිටම දක්නට ලැබුණි. සත්‍යය පමණක් ඉදිරිපත් කරන බව කියන්නාවූද, ස්වාධීනත්වය හා සත්‍යගරුක භාවය සම්බන්ද ආචාරධර්මයන්ගෙන් අතලොස්සක් හෝ රැකගැනීම හේතුවෙන් සමාජ ගෞරවය යම්තාක් දුරකට හිමිකරගත්තාවූද මාධ්‍යයන් ද මේ කරුණ සම්බන්දයෙන් නිර්වචන ඉදිරිපත් කිරීමට තෝරාගෙන තිබුණේ ‘ලංකාවට එරෙහි’ යන සාවද්‍ය ආස්ථානයමය. අදටත් එම ස්ථාවරයේ වෙනසක් නොපෙනේ. කෙතරම් අමිහිරි වුවද, කඨෝර වුවද සත්‍ය තත්වය වාර්තා කළ යුතුය යන මාධ්‍ය ආචාරධර්මය පසෙක දමා තම තමන්ගේ පෞද්ගලික න්‍යාය පත‍්‍රයන් තුල හිඳිමින් මාධ්‍ය හැසිරවීම නිසා යටත් පිරිසෙයින් විචාරශීලී වීමට අපේක්ෂා කරන ශ‍්‍රී ලාංකික පුරවැසියාට සිදුවනුයේ බලවත් අසාධාරණයක්මය.

ඇමෙරිකානු යෝජනාව තුල ඇත්තේ උගත් පාඩම් කොමිසමේ නිර්දේශ ක‍්‍රියාත්මක කිරීමට කාල රාමුවක් සැකසීම අවශ්‍ය බවකි. ඇම්නෙස්ටි ඉන්ටර්නැෂනල් වේවා, හියුමන් රයිට්ස් වොච් වේවා, යටත් පිරිසෙයින් බෑන් කී මූන් විසින්ම පත්කළ දරුස්මාන් කොමිසම විසින් ඉදිරිපත් කළ වාර්තාව හෝ ක‍්‍රියාවට නැගිය යුතු බවක් එහි සඳහන් නොවේ. එබැවින් අපට මේ කියන්නේ කල්නෑර අපේ ඇස්වටය වටා වැටී ඇති අපේම ඉරුණු සරම් කොටය දවටාගන්නා ලෙස මිසක් ඔවුන්ගේ ‘අධිරාජ්‍යවාදී’ කලිසම ඇඳගැනීමට නොවේ.

තවද උගත් පාඩම් කොමිසම අනුගමනය කළ ක‍්‍රියාපිළිවෙල සම්බන්දයෙන් රාජ්‍ය නොවන සංවිධානයන්ගෙන් හා දෙමළ ඩයස්පෝරාවෙන් එල්ල වන්නාවූ චෝදනා බොහෝය. එහි ක‍්‍රියාපිළිවෙලෙහි දෝෂයන් සාධක සහිතව දක්වමින් ඇම්නෙස්ටි ඉන්ටර්නැෂනල් ආයතනය විසින් සවිස්තරාත්මක වාර්තාවක්ද එළිදක්වා තිබුණි. එබැවින් කොටි හිතවාදීන් යැයි මෙතෙක් නිර්වචනය කැරුණු පුද්ගලයන්ගෙන් උගත් පාඩම් නිර්දේශයන් වෙත එල්ල වූයේ “ගල් මුල්” මිස “මල්” නම් නොවේ. එවැනි තත්වයක් යටතේ ඇමෙරිකාව ඇතුළු බටහිර රටවල් රාශියක් උගත් පාඩම් නිර්දේෂයන් සම්බන්දයෙන් ප‍්‍රසාදය පළකර තිබීම ජයග‍්‍රහණයක් ලෙස හුවා දක්වමින් ප‍්‍රවෘත්ති ප‍්‍රකාශයන් තුල උගත් පාඩම් වාර්තාව උඩ දමමින් පරකාසේ ගැසුවේද මේ රජයමය. එහෙත් එය ක‍්‍රියාත්මක මට්ටමට ගෙන ඒමට බලපෑම් එල්ල වන විට රජය ඊට
එරෙහි වන්නේ මීට පෙර පැවති ජනාධිපත් කොමිෂන් වාර්තා වලට අත්කළ ඉරණම මෙයට අත්කිරීමට නොහැකි වීම නිසාද?

මෙයට විරෝධය දැක්වීමට පෙර විරෝධය දැක්වීම සඳහා භාවිතා කරන්නට බලාපොරොත්තු වන ජනබලයට තමන් විරුද්ධ වන්නේ කුමකටදැයි යන්න පිළිබඳ වචනයකින් හෝ නිවැරදි මඟ පෙන්වීමක් ලබා නොදීමටද පාලකයෝ වගබලා ගත්හ. නිරතුරුවම ප‍්‍රකාශ කරනු ලැබුවේ මහින්ද රාජපක්ෂ ජනපතිවරයා ප‍්‍රධාන පාලක පක්ෂය නියෝජනය කරන දැවැන්තයින් ගණනාවක් විදුලි පුටුවට දැක්කීම සඳහා ඇමෙරිකාවේ සහභාගිත්වයෙන් දෙමළ ඩයස්පෝරාව විසින් ක‍්‍රියාත්මක කැරෙන උගුලකින් ශ‍්‍රී ලංකාව ගලවා ගැනීම සඳහා පෙළ ගැසෙන ලෙසය. මෙහිදී සියළුම මාධ්‍ය ආයතන යම් තරමකින් හෝ මෙම සාවද්‍ය මතය සමාජගත කිරීමෙහිලා දායක වූ බව නම් කිව යුත්තේමය. කෙසේ වුවද මේ පිළිබඳව සත්‍ය තත්වය දන්නා සහ එය සමාජගත කිරීමට තරම් නිර්භය වූ පිරිස දේශද්‍රෝහීන් වශයෙන් මුල සිටම හංවඩු ගසනු ලැබීම නිසා දේශපාලන කරළියේ සිටින විවේචකයන් (ප‍්‍රධාන වශයෙන් එක්සත් ජාතික පක්ෂය) සැබෑ තත්වය ජනතාවට අවබෝධ කරවීමට තමන්ට ඇති වගකීමෙන් කරඇරියහ. ජනතා විමුක්ති පෙරමුණද තම දේශපාලන අතීතය තුලදී කරපින්නාගත් ඇමෙරිකානු විරෝධය හේතුවෙන් මේ අවස්ථාවේදී නිවැරැද්ද කුමක්දැයි තම පාක්ෂිකයින් දැනුවත් කිරීමට මැළි බවක් දක්වනු පෙනිණි.

මේ සම්බන්දයෙන් ඉතාම පක්ෂග‍්‍රාහී සදොස් ස්ථාවරයක් ගත් පුවත්පත් අතර “දිවයින” කැපී පෙනුනි. පෞද්ගලික මාධ්‍යයක් වශයෙන් යම්කිසි ස්වාධීනත්වයක් ආරක්ෂා කරගත හැකියැයි කියනු ලැබුවද ස්වේච්ඡාවෙන් ස්වාධීනත්වය කරේ දමාගෙන කඬේ යන්නන්ද සිටින බවට දිවයින හොඳම උදාහරණය බව පසුගිය මාස කිහිපය පුරා තම මාධ්‍ය භාවිතාව හසුරුවන ලද පිළිවෙල මගින් ඔවුන් ප‍්‍රදර්ශනය කළහ. ස්වාධීන රූපවාහිනිියේ හා ජාතික රූපවාහිනියේ ප‍්‍රවෘත්ති ප‍්‍රකාශයන්හි යටත් පිරිසෙයින් විදෙස් පුවත් හෝ මෙම සාවද්‍ය රැල්ලෙන් ගැලවීමට අසමත් වීය. ඇමෙරිකාව විසින් උගත් පාඩම් යෝජනා ක‍්‍රියාත්මක කරන්නැයි බල කරන විට එය ශ‍්‍රී ලංකාවට එරෙහිව යුධ ප‍්‍රකාශ කිරීමක් ලෙස අර්ථ දැක්වූ මේ නල්ලමලේ මාධ්‍යකරුවෝ ඇමෙරිකාව තමන්ගේ විදේශ ප‍්‍රතිපත්තිය හා මානව හිමිකම් සම්බන්දයෙන් අනාගනු ලබන ස්ථාන ඩැහැගැනීමට නිරන්තරයෙන් මාන බලති. අවාසනාවට ඔවුන්ට හසුවී ඇත්තේ බැංකුවක් කඩා පළා යන සැකකරුවෙකුට සිදුකළ වෙඩි තැබීමක්, නිරුවත් විරෝධතාකරුවන්ට කඳුළු ගෑස් ගැසීමක් වැනි සිල්ලර සිදුවීම් පමණි. ලංකාවේදී කඳුළු ගෑස් කන්නට නිරුවතින් යාම අනවශ්‍ය බව අපි අත්දැකීමෙන් දනිමු. නමුත් ඇමෙරිකාවේ නිරුවත් විරෝධතා කරුවන්ට කඳුළුගෑස් ගැසීම කර උඩ තබාගෙන විරෝධය පළ කරන්නේ එහෙව් අපි වීම දෛවයේ සරදමක්දැයි විටෙක සිතේ.

තවත් කණගාටුවට කරුණක් වන්නේ මේ සම්බන්දයෙන් කුහක ස්ථාවරයක් ගන්නා දැනුවත් පුද්ගලයින් පිළිබඳ තත්වයයි. එවැන්නන් ජිනීවා හුටපටය සම්බන්දයෙන් කතාබහ ඇරඹීමේදී මුලින්ම කියන්නේ මෙය පක්ෂ දේශපාලනය සම්බන්ද ප‍්‍රශ්නයක් නොවන බවත් මුළු රටටම අදාළ ප‍්‍රශ්නයක් වන බවත්ය. කෙසේ වෙතත් මෙය අලි බක්ක ප‍්‍රශ්නයක් කොටගෙන හත් පොළේ ගාගත්තේ මහින්ද රාජපක්ෂ රජයම බවත් මෙයින් යම් අගතියක් වන්නේ නම් එයට මුහුණ දීමට සිදුවන්නේද ඔවුන්ටම බවත් දන්නෝ දනිති. නමුත් ඉහතකී දේශපාලන කුහකයින් නිරන්තරයෙන් මෙය ඊනියා ජාතික අර්බුදයක් බවට පත්කොට සන්ධාන රජය මෙහි ආනුභාවයෙන් තවත් බොහෝකල් යෙහෙන් වැජබෙන තත්වයක් නිර්මාණය කිරීමට යත්න දරති. මන්ද මේ රජයේ නොපැවැත්ම යනු ඔවුන්ගේ බහින කළාව ඇරඹීම බව ඔවුන් හොඳින් දන්නා බැවිනි. එක්කෝ තම පවුලේ කෙනෙකුට දේශපාලන පත්වීමක් ලබාගෙනය, නැතිනම් තමා සරම කරේ තබාගෙන සන්ධාන රජයට කඬේ ගිය බැවින් ආණ්ඩු පෙරළියක් ඇති වුවහොත් තමාට හොම්බෙන් යන්නටම කෙළ වෙන බව විශ්වාස කිරීමය. මේ නිසා බොහෝවිට කඩපිල්වලදී, පන්සල් වලදී මෙවන් බල පණ්ඩිතයන් තම අඳබාලයන් හට ජිනීවා පිළිබඳ වැදිබණ දෙසනු කොතෙකුත් දක්නට ලැබේ.

කෙසේ වෙතත් අවසාන වශයෙන් කිවයුත්තේ යටත් පිරිසෙයින් උගත් පාඩම් නිර්දේශ ක‍්‍රියාත්මක කරන ලෙස ඉල්ලා සිටින යෝජනාවක් හෝ ගෙන ඒමෙන් අමෙරිකාව සන්ධාන රජයට කැර තිබෙන්නේ කියලාවත් කරවාගත නොහැකි අති විශාල උදව්වක් බවයි. තෙල් මිළ වැඩිවීම, විශ‍්‍රාම වැටුප් පනත, පාලනය කළ නොහැකි වැඩවර්ජන රැල්ල යනාදිය නිසා නිකට ළඟටම එරී සිටි ආණ්ඩුව ජිනීවා ගුණ්ඩුව හරහා රටේ ප‍්‍රශ්න කතා කරන්නන් දේශද්‍රෝහීන් බවට පත්කිරීම නිසා නැවතත් ඔවුන්ට දෙයියනේ කියා නරක හීන නොපෙනී නින්ද යන කලක් උදාවී ඇත. නමුත් සකළ ශ‍්‍රී ලංකාවාසීන්ම වටහාගත යුතු වන්නේ කුමන පක්ෂයක් බලයේ සිටියද ඔවුන් සැහැල්ලූවෙන් සිටිනවානම් සිටින්නේ ඔබ පිටේ අධි බරක් පැටවීමෙන් පසුව බවයි. බොහෝවිට ඔබ කරගහගෙන යන්නේ අනුන්ගේ බරක් බව ඔබ නොදන්නවා විය හැකිය.

Advertisements
 
1 Comment

Posted by on March 19, 2012 in Uncategorized

 

One response to “ජිනීවා ගැන ඇත්ත කියන්න මේ තරම් භය ඇයි?

  1. niccolobmac

    March 20, 2012 at 4:30 pm

    I understand your position, and commend you for your effort and courage ( even anonymously ) to voice your opinion. Yet , I doubt anyone will change his/ her opinion based on this write-up. Without trying to persuade to change your stand, I would like to ask…….

    1.This Resolution is initiated mainly by US. given their record on human right violations in other countries ( Vietnam, Iraq , Afghanistan …..) can we expect they are really concerned about human right situation in Sri Lanka ?

    2. Resolution is supported mainly by western countries like US, EU ,Norway ,,etc, where Tamil diaspora is having considerable influence. Given the Tamil diaspora backing to LTTE, and their silence on LTTE atrocities , can we consider this is genuine concern by these countries about human right situation in Sri Lanka?

    3. Third paragraph of the UNCHR resolution pave the way for the UN body ( influenced by US and western countries ) to intervene in present Government policy / actions in this respect. Do you expect their intervention will result in implementing “correct ” policies ?

    4. We can clearly understand why the Tamil political organizations / leaders trying to influence Srilankan (Sinhalese ) Government through this UN route,. For them, their is no other way (other than violence). But can a “right thinking ” opinion maker in the South can recommend UN route to change Government policy / actions ?

     

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: